Indarkeria matxistari aurre egiteko kontraesanen inguruko gogoeta kolektiboa bultzatzeko hitzaldia, ostiralean, apirilak 12

• 19:00etan izango da, udaletxeko pleno aretoan, Norma Vazquez psikologa feministak gidatuta. 
• Hitzaldia Tolosako osteopataren kasuari eta Udala biktimen erreparaziorako eskubidea bermatzeko egiten ari den esku-hartzeari lotuta dago. 

‘Yo si te creo… siempre que no conozca al agresor’ izenburupean, datorren ostiralean, apirilak 12, indarkeria matxista hizpide duen hitzaldi irekia antolatu du Tolosako Udalak, hain zuzen, osteopataren kasuari eta Udala biktimen erreparaziorako eskubidea bermatzeko egiten ari den esku-hartzeari lotuta. 

Hitzaldia herritar ororentzat irekia izango da eta 19:00etan hasiko da, udaletxeko pleno aretoan. Norma Vazquez psikologa feministak gidatuta, helburu izango du indarkeria matxistari aurre egiteko gizartean sortzen diren kontraesanen inguruan gogoeta kolektiboa bultzatu eta zabaltzea. 

Horrela, hitzaldian bertan, elkarrizketarako espazioa eskainiko da eta indarkeria matxistaren biktimekiko zein indarkeria mota hori eragiten duenekiko pertzepzioen eta jarreren inguruan  hausnarketa egitera gonbidatuko zaie parte-hartzaileei, bereziki biktimak edota bere ingurukoek erasotzailea ezagutzen duten egoeren inguruan.