Datorren ekainaren 7an ehun urte beteko dira Tolosaldeko hamalau mendizalek berealdiko erronka egitea pentsatu zutenetik. 1925eko ekainaren 7 hartan, Francisco Larrañaga Goya (Patxi Txortxi) buru zutela, mendi zeharkaldi zirkular bati ekin zioten14 lagunek, Tolosan hasi eta bukatu. Ibilbidea, hauxe: Tolosa, Gaztelu, Uli, Gorriti, Lekunberri, San Miguel, Guardetxe, Igaratza, Amezketa, Alegi eta Tolosa. Guztira, 70 kilometro. 14 Orduko Ibilaldia izenarekin igaro da historiara zeharkaldi hura, ondo prestatutako mendizaleentzat hori baitzen eta hori baita ordutegi egokiena.

Aipatutako Larrañagaz gain, hauek izan ziren ibilaldian parte hartu zuten beste mendizaleak: Ramon Barrio, Jose Albero, Paco Tuduri, Eduardo Laborde, Juan Jauregi, Anthon Subijana, Teodoro Agote, Ricardo Diaz, Francisco Labaien, Ricardo Azaldegi, Manuel Laborde, Victor Arrillaga eta Simon Arrúe.

Hurrengo urtean, berriro errepikatu zuten martxa maiatzaren 30ean, lehen aldian baino mendizale gehiagok. Eta 1943an eta 1967an ibilaldi neurtu modura antolatu zuen Aralarko Adiskideak elkarteak, lehia izaerarik gabe, ibilbide eta izen berarekin.

1972. urtetik aurrera, Montrealeko Olinpiar Jokoen harira, “14 Orduko Ibilaldia” instituzionalizatua geratu zen urte olinpikoekin bat etorriz. Hala, Euskal Herriko mendizale martxa ezagunena eta arrakastatsuena bihurtu zen, beti Aralarko Adiskideak elkarteak antolatuta

.Geroztik, Covidaren pandemia dela-eta 2020an izan ezik, lau urtean behin berritu da hitzordua, eta milaka mendizale elkartu dira orain arteko hamahiru ekitaldi “olinpikoetan”. Aurten, beraz, ehun urte dira lehen ibilaldi hura egin zenetik, eta Aralarko Adiskideak elkarteak ekitaldi hauek antolatu ditu mendeurrena oroitzeko:

* ERAKUSKETA

Garaiko jatorrizko agiriak, argazkiak, kartel bilduma osoa, liburuxkak edo esku-orriak, diplomak, ordutegi kontroletako fitxak, partaideen opariak eta bestelako objektuak izango dira ikusgai. Azken urteotako bideoak ere ikusgai izango dira modu jarraituan, horretarako egokitutako gune batean.

* Hitzaldia eta proiekzioa. Ekainaren 5ean, 19:00etan, Topicen.

“14 Orduen mendeurrenean” hitzaldi-proiekzioa, Francisco Tuduriren eskitik, martxaren jatorriari eta bilakaerari buruz. Azalpenekin batera, hainbat argazki eta dokumentu erakutsiko ditu.

Ondoren, Pablo Dendaluzek (Tolosako Kaxoia) eginiko bideo bat proiektatuko da.