Hogei urte beteko ditu Amalurrek. Bi hamarkadaz mundu zabaleko istorioak kontatzeko eta entzuteko aukera eskaini dute jardunaldiek. Bada, urtemuga borobil honen aitzakian, ikuspegi zabalago batekin osatu da aurtengo eskaintza: bidaia eta antropologia ez ezik, ingurumena eta zientzia ere izango dute hizpide.

‘Hogei urte zuekin gailurrean’ lelopean, bederatzi hitzaldi, bi tailer eta ikastetxeei zuzendutako prestakuntza-jardunaldi bat eskainiko dira aurten. Bederatzi hitzaldietatik bost, bidaien eta antropologiaren ingurukoak izango dira; gainerakoek, berriz, ingurumenean eta zientzian sakonduko dute.

Otsailaren 27an, ostirala, izango da lehen hitzordua. Asier Hilario tolosarraren eta Jerónimo Lopez irakaslearen arteko elkarrizketa bat (gazteleraz) entzuteko aukera izango da ‘Mendiak mintzo direnean: harkaitzei, izotzari eta zientziari buruzko elkarrizketak’ izeneko estreineko saioan. Hitzaldi guztiak 19:00etatik 20:30era izango dira, Topic-eko Antxon Elosegi areto nagusian, martxoaren 27koa izan ezik. Hori 19:30ean hasiko da.

Sarrera doakoa izango den arren, aldez aurretik gonbidapenen erreserba egitea beharrezkoa izango da. Saio bakoitza baino astebete lehenago aktibatuko da horretarako aukera: Topic-eko leihatilan edo webgunean eskuratu ahal izango dira. Pertsona bakoitzeko gehienez hiru gonbidapen eskuratu ahal izango dira.

PROGRAMA